دولت و وسائل لوٹنے والے کرپٹ عناصر کو قانون کے کٹہرے میں ہر صورت لایا جائیگا ،ڈی جی نیب

دولت و وسائل لوٹنے والے کرپٹ عناصر کو قانون کے کٹہرے میں ہر صورت لایا جائیگا ،ڈی جی نیب

• June 28, 2018, 9:30 pm
• National News
• 105 Views

کوئٹہ (سٹاف رپورٹر )ڈائر یکٹر جنرل نیب بلوچستان مرزا محمد عرفان بیگ نے کہا ہے ملک سے کرپشن کا خاتمہ ملکی استحکام کے لئے نا گزیر ہے ، عوام الناس میں بد عنوانی کے تدارک کے لئے شعورو آگاہی مہم کی کامیابی ہماری ترقی کی نئی راہیں متعین کرے گا، عوام سے دھوکہ دہی اورقومی دولت و وسائل لوٹنے والے کرپٹ عناصر کو قانون کے کٹہرے میں ہر صورت لایا جائیگا ، بدعنوانی کی روک تھام اور میرٹ کی بحالی کیلئے تمام وسائل بروئے کار لائے جارہے ہیں، کرپشن سے متعلق تمام شکایات کی شنوائی یقینی بنائی جائیگی ،ان خیالات کا اظہار انہوں نے کھلی کچہری کے دوران صوبے بھر سے آنے والے سائلین سے کیا۔چیئرمین نیب، جسٹس جاوید اقبال کے احکامات کی روشنی میں مرزا محمد عرفان بیگ ،ڈائیریکٹر جنرل نیب بلوچستان نے نیب کوئٹہ میں ایک کھلی کچہر ی کا اہتمام کیا جس میں بلوچستان کے مختلف اضلاع سے تعلق رکھنے والے بڑی تعداد میں شکایت کنندگان ڈی جی نیب بلوچستان کے روبرو پیش ہوئے۔اس موقع پرڈائیریکٹر جنرل نیب نے شکایت کنندگان کوکرپشن کے تدارک کے حوالے سے مکمل تعاون کی یقین دہانی کراتے ہوئے متعدد شکایات پر قانون کیمطابق ضروری احکامات جاری کردئے،ڈی جی نیب بلوچستان نے اس موقع پر درخواست گزاروں کو یقین دہانی کرائی ہے کہ کرپشن کے تدارک کے حوالے سے تمام شکایات پر قانون کیمطابق عملدرآمد کیا جائے گا۔مرزا محمد عرفان بیگ نے کرپشن کے خاتمہ کے عزم کا اظہار کرتے ہوئے کہا کہ قومی احتساب بیورو عوام کی کرپشن کے حوالے سے شکایات کے ازالہ کیلئے کوئی کسر اٹھا نہیں چھوڑیگا۔