موسم سرما میں کورونا وائرس شدت اختیار کرسکتا ہے، شاہ محمود قریشی

موسم سرما میں کورونا وائرس شدت اختیار کرسکتا ہے، شاہ محمود قریشی

• August 29, 2020, 8:24 pm
• National News
• 139 Views

وزیرخارجہ مخدوم شاہ محمود قریشی نے کہا ہے کہ موسم سرما میں کورونا وائرس شدت اختیارکرسکتا ہے، پاکستان میں کورونا صورتحال بہتر ہوئی ہے، اللہ کا شکر ہے کہ آج حضرت امام حسین کی یاد کورونا سے نجات کے ماحول میں منائی جارہی ہے، عالمی سطح پر پاکستان کی انسداد کورونا پالیسی کو سراہا گیا۔
رضا ہال ملتان میں42 ویں سالانہ حسینیہ کانفرنس سے خطاب کرتے ہوئے مخدوم شاہ محمود قریشی نے کہا کہ مقبوضہ کشمیر میں آج عزاداری اور محرم کے جلوسوں پر پابندی ہے۔
وہاں مذہبی آزادی پر بھی قدغن ہے اور عید کی نماز کی بھی اجازت نہیں دی گئی تھی۔

انسانی حقوق کے علمبرداروں کو مقبوضہ کشمیر میں بھارتی مظالم کا نوٹس لینا ہوگا۔ مقبوضہ کشمیر کے عوام نے بتادیاکہ اب ان کی منزل جبر سے آزادی ہے۔ بھارت نے جس طرح کشمیریوں کی آواز دبائی وہ پوری دنیا نے دیکھا۔ مقبوضہ کشمیر میں بلیک آوٹ مسلسل جاری ہے۔ کشمیری جفا کشوں نے بھارت کی ہر پیشکش ٹھکرا دی، کشمیریوں نے بھارت کو پیغام دے دیا کہ ہماری منزل آزادی ہے۔
انہوں نے کہا کہ یہ اطمینان کی بات ہے کہ آج حضرت امام حسین ؓ کی یاد کورونا سے نجات کے ماحول میں منائی جارہی ہے۔ فرض کریں کہ آج اگرلاک ڈاؤن ہوتا تو کیا صورتحال ہوتی۔ انہوں نے کہا کہ ماہرین کے خدشے کے مطابق آج ملک میں کورونا متاثرین کی تعداد 20 لاکھ ہونی چاہیے تھی لیکن اللہ کا کرم ہوا اور آج پاکستان میں 91 فیصد وینٹی لیٹرز خالی ہیں، اسپتالوں میں خصوصی وارڈز پر دباؤ نہیں۔
وزیر خارجہ نے کہا کہ ماہرین کورونا وائرس کنٹرول کرنے پر پاکستان کی کیس اسٹڈی کرنا چاہتے ہیں، کورونا کا خطرہ ابھی ٹلا نہیں ہمیں احتیاط کرنا ہوگی۔ خدشہ ہے کہ سردیوں میں کورونا کی دوسری لہر آسکتی ہے اس لیے احتیاط کرنا چاہیے۔ کراچی کی صورتحال پر گفتگو میں انہوں نے کہا کہ کراچی کے لیے دعا کریں، آج کراچی والے مشکلات سے دوچار ہیں، وہاں سیوریج ، نکاسی اور پانی کا کوئی انتظام نہیں کیا گیا، کراچی میں انتظامیہ نے اپنی تجوریاں بھریں اورشہر کو اس کے حال پر چھوڑ دیا۔کراچی میں کسی قسم کی کوئی منصوبہ بندی نہیں کی گئی۔