مکہ مکرمہ میں پاکستان اور سعودی عرب کے مابین حج معاہدہ 2020ء طے پا گیا

مکہ مکرمہ میں پاکستان اور سعودی عرب کے مابین حج معاہدہ 2020ء طے پا گیا

• December 5, 2019, 11:16 am
• National News
• 170 Views

اسلام آباد (ویب ڈیسک) مکہ مکرمہ میں پاکستان اور سعودی عرب کے مابین حج معاہدہ 2020ء طے پا گیا۔ ترجمان مذہبی امور کے مطابق وزیر مذہبی امور پیر نور الحق قادری نے سعودی ہم منصب ڈاکٹر صالح بن بنتن کے ہمراہ معاہدے پر دستخط کئے۔ ترجمان عمران صدیقی کے مطابق آئندہ حج کے موقع پر دو لاکھ پاکستانی حجاج کرام فریضہ حج ادا کرینگے ۔
معاہدے سے قبل پیر نور الحق قادری کی سربراہی میں پاکستانی وفد نے سعودی ہم منصب سے حج انتظامات پر مذاکرات کیے۔ ترجمان کے مطابق سیکرٹری میاں مشتاق بورانہ ، پاکستانی سفیر راجہ علی اعجاز ، ڈی جی حج ابرار مرزا ، ڈائریکٹر ساجد اسدی بھی مذاکراتی ٹیم میں شامل تھے ۔سعودی وزیر حج و عمرہ ڈاکٹر صالح بن بنتن کے ہمراہ نائب وزیر حج، سیکرٹری حج، موسسہ، نقابہ سیارات، ادلہ کے سربراہ شریک ہوئے ۔
حج 2020ء کیلئے حجاج کو مزید بہتر سہولیات کی فراہمی کیلئے پاکستانی وفد نے متعدد مطالبات پیش کئے ۔ پیر نور الحق قادری نے کہاکہ روڈ ٹو مکہ پراجیکٹ میں دیگر شہروں کی شمولیت ، مشاعر میں اضافی سہولیات ، ملکی کوٹہ میں مزید اضافہ کا مطالبہ کرتے ہیں۔ سعودی وزیر حج نے کہاکہ منیٰ میں گنجائش کم ہے تاہم حج کوٹہ میں اضافہ کی درخواست پراعلیٰ حکام سے بات کی جائے گی۔
انہوںنے کہاکہ پچھلے سال روڈ ٹو مکہ پراجیکٹ میں پاکستان کی شمولیت نہایت کامیاب رہی: ڈاکٹر صالح بن بنتن نے کہاکہ دیگر شہروں تک روڈ ٹو مکہ پراجیکٹ کی توسیع کیلئے سعودی وزارتِ داخلہ سے بات کی جائے گی۔منیٰ، مزدلفہ ، عرفات میں شکایات کے ازالے کیلئے سعودی۔پاک جوائنٹ ورکنگ کمیٹی کے قیام کا فیصلہ کیا گیا ۔سعودی وزیر نے کہاکہ پاکستان اور سعودی اراکین پر مشتمل دس رکنی کمیٹی مسائل کے ازالے کیلئے موقع پر احکامات جاری کرے گی۔
سعودی وزیر حج نے کہاکہ کمیٹی مشاعر میں پاکستان کی مرضی کے مطابق کھانا اور سفری سہولیات کی فراہمی کو یقینی بنائے گی۔سعودی وزیر حج نے کہاکہ پاکستانی وفد (آج) جمعرات کو مختلف خدمات کے سعودی دفاتر کا دورہ کرے گا اور معاہدات طے کیے جائیں گے۔