3 ماہ میں تبدیلی کی یقین دہانی سے متعلق مولانا فضل الرحمان کا بڑا دعویٰ

  • November 25, 2019, 1:21 pm
  • National News
  • 156 Views

اسلام آباد: جعمیت علمائے اسلام ف کے سربراہ مولانا فضل الرحمان نے حکومت کی تبدیلی سے متعلق بڑا دعویٰ کر دیا ہے۔

تفصیلات کے مطابق مولانا فضل الرحمان نے بڑا دعویٰ کر دیا ہے کہ انھیں 3 ماہ میں تبدیلی کی یقین دہانی کرائی گئی ہے، تسلیم کر لیا گیا ہے کہ حکومت نہیں چل سکتی۔

مولانا فضل الرحمان کا کہنا تھا کہ رہبر کمیٹی نے حکومتی ٹیم سے کہا تھا کہ ہمیں استعفیٰ یا برابر کی چیز چاہیے، ایک نجی ٹی وی کو انٹرویو دیتے ہوئے انھوں نے کہا کہ یہ برابر کی چیز ہمیں حاصل ہونے جا رہی ہے۔

فضل الرحمان نے انٹرویو میں ’برابر کی چیز‘ کی بھی وضاحت کی ہے، انھوں نے کہا کہ برابر کی چیز 3 ماہ میں الیکشن کا انعقاد ہے

خیال رہے کہ جے یو آئی سربراہ نے ایک اور آل پارٹیز کانفرنس بلا لی ہے، اس سلسلے میں انھوں نے تمام اپوزیشن جماعتوں کو شرکت کی دعوت دی ہے، بلاول بھٹو زرداری نے اے پی سی میں شرکت کا اعلان بھی کر دیا ہے۔

ادھر فردوس عاشق اعوان نے آج توہین عدالت کے کیس میں معافی قبول ہونے کے بعد پریس کانفرنس میں کہا مولانا جھوٹ کا سہارا لے کر خود کو تسلیاں دے رہے ہیں، مولانا صاحب کے ساتھ اپنے لوگ نہیں تو عوام کیسے ہوں گے، ان کا پلان اے بری طرح ناکام ہوا ، پلان بی بھی رسوائی کا سبب بنا۔

Featured News